Դիմորդները շարունակում են ծանոթանալ տնտեսագիտական մայր բուհին
Բուհերի դիմորդների հայտագրման գործընթացի մեկնարկին ընդառաջ՝ ավարտական դասարանների աշակերտները շարունակում են տեղեկություններ որոնել մասնագիտական ուսումնական հաստատությունների մասին: ՀՊՏՀ ներկայացուցիչները, դպրոցների հետ համագործակցության ծրագրի շրջանակում, տեղեկատվական ձևաչափի հանդիպումներ են կազմակերպում դիմորդների համար. հերթական այցով ծրագրի ղեկավար, լեզուների ամբիոնի դասախոս Լուսինե Կարագուլյանը, միջազգային տնտեսական հարաբերությունների ամբիոնի ասիստենտ, մարքեթինգի և բիզնեսի կազմակերպման ֆակուլտետի դեկանի տեղակալ Կարմեն Գրիգորյանը, տնտեսագիտության տեսության ամբիոնի դոցենտ Նարինե Խալաթյանը, 4-րդ կուրսի ուսանողուհի Անի Մավյանը եղել են Երևանի Նորիկ Խաչատրյանի անվան թիվ 113 դպրոցում (Հաղթանակ թաղամաս):
Համալսարանականներին դիմավորել է ուսմասվար Սուսաննա Խալաթյանը:
Ավագ դասարանի աշակերտների հետ հանդիպման ընթացքում դասախոսները նրանց ուշադրությանն են ներկայացրել ՀՊՏՀ մասնագիտություններին, վարձավճարներին, սոցիալական ծրագրերին և ուսանողական կյանքին վերաբերող մանրամասներ, այնուհետև ցուցադրվել է բուհի մասին պատմող տեսանյութ: Ուսանողուհի Անի Մավյանը խոսել է իր՝ զբոսաշրջության կառավարում մասնագիտության մասին: Դիմորդներին տրամադրվել են «Տնտեսագետ» ամսագրեր և տեղեկատվական գրքույկներ:
Հանդիպման ավարտին դպրոց-համալսարան համագործակցությունը վավերացվել է հուշագրում: «Շատ աշակերտներ կային, որ տնտեսագիտական կրթություն էին ուզում ստանալ, բայց բուհի ընտրության հարցում չէին կողմնորոշվել: Հանդիպման ավարտին նրանք ասացին, որ հենց ՀՊՏՀ են դիմելու», - լրատվության և հասարակայնության հետ կապերի բաժնի հետ զրույցում ասաց Լուսինե Կարագուլյանը և հավելեց, որ այս ամիս մեր համալսարանում հյուրընկալվելու են նշված դպրոցի աշակերտները:
ՀՊՏՀ Լրատվության և հասարակայնության հետ կապերի բաժին