Դասը վարեց ԿԲ ներկայացուցիչը
Ֆինանսական ֆակուլտետի բանկային գործ մասնագիտության 4-րդ կուրսում այսօր «Բանկային վերահսկողություն և աուդիտ» առարկայի դասը վարեց հրավիրյալ մասնագետը՝ ՀՀ կենտրոնական բանկի ֆինանսական վերահսկողության վարչության բանկային վերահսկողության բաժնի պետ Վաղինակ Ստեփանյանը: Ներկա էին կառավարչական հաշվառման և աուդիտի ամբիոնի վարիչ, տնտեսագիտության դոկտոր Լիանա Գրիգորյանը, տ.գ.թ., դոցենտ Կարեն Առաքելյանը, վերոնշյալ առարկայի դասախոս, տ.գ.թ., դոցենտ Վահան Բաբայանը: Ողջույնի խոսքով հանդես եկավ Լիանա Գրիգորյանը և նշեց, որ գործատուի պահանջներից ելնելով` անհրաժեշտություն կա հնարավորինս շատ գործնական գիտելիքներ փոխանցելու ուսանողներին, և դրան նպաստում են նաև հրավիրված մասնագետների վարած դասերը:
Դասախոսության առանցքում էին բանկային վերահսկողության էությանը, առանձնահատկություններին առնչվող հարցերը, բանկի կառավարման գործընթացում աուդիտի դերը: Վաղինակ Ստեփանյանը բանկային վերահսկողությունը ձևակերպեց որպես ֆինանսական ինստիտուտների գործունեության նկատմամբ պետական վերահսկողության օղակ, որը հասարակության շահերից ելնելով՝ տնտեսության բանկային հատվածի զարգացման ապահովմանն ուղղված մեխանիզմների և մեթոդների համակարգ է: Բանախոսը ներկայացրեց Կենտրոնական բանկի վերահսկողության ձևերը, գործիքները, մանրամասն անդրադարձ կատարեց ռիսկերի վրա հիմնված վերահսկողությանը:
Դասախոսության ընթացքում բանախոսը պատասխանեց նաև ուսանողներին հետաքրքրող հարցերին:
Մեզ հետ զրույցում Վահան Բաբայանը ներկայացրեց բաց դասի անցկացման նպատակը և նշեց, որ հրավերները շարունակական են լինելու:
«Հրավիրյալ դասախոսն իրեն վերապահված գործառույթներով իրականացնում է ՀՀ բանկերի վերահսկողության գործընթացի կազմակերպում, որը սերտորեն փոխկապակցված է դասավանդվող՝ «Բանկային վերահսկողություն և աուդիտ» առարկայի հետ: Ուստի, առարկան ամբողջովին ներկայացնելուց առաջ ցանկալի է ուսանողներին ընդհանուր պատկերացում տալ դրա պրակտիկ կիրառման մասին»:
ՀՊՏՀ Լրատվության և հասարակայնության հետ կապերի բաժին