«Ինգո Արմենիան» հավաստագրեր հանձնեց ՀՊՏՀ ուսանողներին. ընդլայնվող համագործակցություն

Դիտումների քանակ՝ 902

Մեր համալսարանի ապահովագրական գործ մասնագիտության 3-րդ կուրսի բարձր առաջադիմություն ունեցող 20 ուսանող անցնող կիսամյակում  «Ինգո Արմենիա» ապահովագրական ընկերությունում մասնակցել է վարպետության եռամսյա  դասերի: Այսօր հանդիսավոր կերպով տեղի ունեցավ դասընթացներն  ավարտած ուսանողների հավաստագրերի հանձնման արարողությունը, որին ներկա էին ՀՊՏՀ բանկային գործի և ապահովագրության  ամբիոնի ղեկավար Աննա Ասլանյանը, «Ինգո Արմենիա» ընկերության գործադիր տնօրեն Լևոն Ալթունյանը, նույն ընկերության կորպորատիվ հաճախորդների սպասարկման բաժնի ղեկավար Լիլիթ Շմավոնյանը:

Ուսանողներին շնորհավորեց տնօրեն Լևոն Ալթունյանը`  նշելով, որ իրենց ընկերությունը նոր կադրերով համալրելու պարագայում առաջինը նկատի են ունենալու  հենց ՀՊՏՀ ուսանողներին:

Աննա Ասլանյանը շնորհակալական խոսք ասաց «Ինգո Արմենիայի» ղեկավարին՝ ընդգծելով, որ համագործակցությունն արդյունավետ է և ընդլայնվող: Ամբիոնի ղեկավարը նշեց՝ ուրախալի է, որ գործատուն ևս  շահագրգռված է լավ մասնագետներ պատրաստելու գործում և անմիջականորեն մասնակցում է ուսումնական գործընթացի կազմակերպմանը:

Լիլիթ Շմավոնյանը տեղեկացրեց, որ վարպետության դասընթացներին մասնակցած ուսանողները կհրավիրվեն հարցազրույցի և ընտրված ուսանողները հնարավորություն կստանան ամռանը «Ինգո Արմենիայում» փորձառություն անցնելու, ինչն էլ, իր հերթին, հնարավորություն է ընձեռում մշտական աշխատանքի անցնելու ապահովագրական ընկերությունում: Ընկերության աշխատակցի խոսքով՝ անցած տարի նման եղանակով աշխատանքի է անցել  ՀՊՏՀ 8 ուսանող:

Մեզ հետ զրույցում ուսանողուհի Մերի Հարությունյանը վստահորեն ասաց, որ դասընթացներին մասնակցությունը լրացրել է իրենց գործնական գիտելիքները և սա, առաջին հերթին, օգնելու է ավարտական (դիպլոմային) աշխատանք կատարելուն, իսկ հետագայում՝ մասնագիտական ոլորտում աշխատանքի անցնելուն:

Նշենք, որ արդեն 2-րդ տարին է՝ ՀՊՏՀ ուսանողների համար կազմակերպվում են վարպետության դասեր, որոնք վարում են   «Ինգո Արմենիայի» կառուցվածքային ստորաբաժանումների ղեկավարները: Սույն ծրագիրն իրականացվում է մեր համալսարանի և «Ինգո Արմենիա» ապահովագրական ընկերության համագործակցության շրջանակներում: Հիշեցնենք, որ 2014թ. նոյեմբերի 13-ին կողմերի միջև ստորագրվել է համագործակցության հուշագիր:

Շնորհավորում ենք մեր ուսանողներին:

ՀՊՏՀ Լրատվության և հասարակայնության հետ կապերի բաժին