Կանանց և աղջիկներին նվիրված միամսյակի միջոցառումները շարունակվում են. ֆլեշմոբ ՀՊՏՀ-ում (լուսանկարներ)
ՀՊՏՀ կառավարման ֆակուլտետի ուսանողական խորհրդի նախաձեռնությամբ այսօր երկար դասամիջոցին ուսանողները բակում իրականացրեցին յուրատեսակ ֆլեշմոբ. մեր բուհի տաղանդավոր ջութակահարուհիները հանդես եկան գեղեցիկ կատարումներով: Ուսանող ջութակահարները նվագում էին բակին հարակից տարբեր հատվածներում՝ մի քանիսը պատուհանի մոտ, մյուսները՝ բակում: Ինչպես նշեցին կազմակերպիչները, ֆլեշմոբը նվիրված էր կանանց և աղջիկների միամսյակին և նպատակ ուներ յուրահատուկ ձևով շնորհավորելու մեր բուհի գեղեցիկ սեռի ներկայացուցիչներին: Ֆլեշմոբին հետևում էին ինչպես ուսանողները, այնպես էլ բուհի աշխատակիցները, դասախոսները:
Կառավարման ֆակուլտետի 1-ին կուրսի ուսանողուհի Ժանետա Հովակիմյանը ՀՊՏՀ լրատվության և հասարակայնության հետ կապերի բաժնի հետ զրույցում նշեց, որ հետաքրքիր է նմանատիպ միջոցառումներին ներկա գտնվելը: «Հաճելի է, երբ առիթ ենք ունենում փոքր-ինչ դասերից կտրվելու և մեր համալսարանի բակում նման գեղեցիկ միջոցառման մասնակցելու: Այս տեսակ միջոցառումները շատ հետաքրքիր են հատկապես մեզ՝ 1-ին կուրսեցիներիս համար, քանի որ դրանք մեր ուսանողական կյանքը հագեցած և գեղեցիկ են դարձնում: Ուրախ ենք, որ ՀՊՏՀ-ում նմանատիպ միջոցառումներ կազմակերպվում են տարբեր առիթներով՝ հաճախակի»,-նշեց ուսանողուհին:
Ֆլեշմոբի ավարտին կառավարման ֆակուլտետի լսարաններից մեկի պատուհանից ուսանողները կապույտ և արևաշող երկինք բաց թողեցին «Շնորհավոր մարտի 8» մակագրությամբ կարմիր փուչիկներ:
Դասամիջոցն ավարտվեց, զանգը հնչեց, ու բոլորը շտապեցին դասի՝ բարձր տրամադրություններով:
ՀՊՏՀ Լրատվության և հասարակայնության հետ կապերի բաժին