Բաց դաս՝ «Շոկոլադի շուկայի ուսումնասիրություն» խորագրով

«Շոկոլադի շուկայի ուսումնասիրություն» խորագրով այսօր մարքեթինգի և բիզնեսի կազմակերպման ֆակուլտետի մարքեթինգ մասնագիտության 3-րդ կուրսում կազմակերպվել էր բաց դաս՝ դասախոս,տ.գ.թ., դոցենտ  Մարինե Նիկողոսյանի նախաձեռնությամբ: Դասին մասնակցում էին մարքեթինգի ամբիոնի դասախոսներ:

Բաց դասի բանախոսներ, հետազոտության կատարողներ Ժենյա Բաղդասարյանը, Մարիամ Թումանյանը և Գոռ Հարությունյանը  ներկայացրեցին  շոկոլադի շուկայի՝ իրենց կատարած  հետազոտությունը՝ խոսելով շոկոլադի ստեղծման պատմության, շոկոլադ  արտադրող աշխարհի առաջատար  ընկերությունների, դրանց մասնաճյուղերի  (աշխարհում), տեսականիների, սպառման  ծավալների և այլ տվյալների մասին: Ներկայացվեցին   «Nestle», «Roshen» և  աշխարհահռչակ այլ ընկերությունների  վերաբերյալ  ուշագրավ  տեղեկություններ, առանձնահատուկ անդրադարձ եղավ հայրենական «Grand candy» ընկերության արտադրությանը, մասնավորապես, շոկոլադի ապրանքատեսականուն: Ուսանողներն իրականացրել էին նաև սոցիալական հարցումներ՝ պարզելու , թե ինչ շոկոլադ են նախընտրում  մարդիկ, շոկոլադ ընտրելիս ինչ հանգամանքների են ուշադրություն դարձնում (համ, հոտ, տեսք, փաթեթավորում,որակ, գին), ովքեր են շոկոլադի հիմնական սպառողները (տարիք, սեռ ) և այլն:

Հետաքրքիր է, որ ըստ ուսանողների իրականացրած հարցման՝ շոկոլադ գնելիս մարդկանց զգալի մասը (Հայաստանում)  կարևորում է համը, ապա՝ բույրը, երկրորդային կարևորություն ունեն փաթեթավորումը, տեսքը: Հետազոտողները ներկայացրեցին նաև իրենց առաջարկությունները՝ շոկոլադի արտադրությունը  և ծավալները խթանելու նպատակով:

Դասի ավարտին Մարինե Նիկողոսյանը գոհունակություն հայտնեց և նշեց, որ ուսանողները ներկայացրեցին իրենց հետազոտության մի փոքրիկ հատվածը միայն, մինչդեռ իրականացրել են բավականին ընդգրկուն և խորը վերլուծություններ:

ՀՊՏՀ լրատվության և հասարակայնության  հետ կապերի զրույցում դասախոսը նշեց, որ նմանատիպ հետազոտություններն ու դասերը շարունակական կլինեն. այս մոտեցումն ուսանողներին խրախուսելու  մի ձև էր և նրանց համար  որևէ ոլորտում ուսումնասիրություն կատարելու  ուսուցողական  օրինակ:

Վերջում բանախոսները  ներկաներին հյուրասիրեցին տարբեր ապրանքանիշերի շոկոլադե սալիկներ:

ՀՊՏՀ Լրատվության և հասարակայնության հետ կապերի բաժին